დასავლეთ საქართველოს 10 მუნიციპალიტეტში ახალგაზრდული ენერგია ისევ აინთო – დაიწყო ახალი ეტაპი, ახალი ჯგუფებითა და ახალი იდეებით! პროექტის ფარგლებში ჩამოყალიბდა ახალგაზრდა მონაწილეთა ჯგუფები, რომლებიც მომდევნო ექვსი თვის განმავლობაში გაივლიან ტრენინგების სერიას კონფლიქტის მართვისა და ძალადობის პრევენციის მიმართულებით.
პირველივე შეხვედრები გამოირჩეოდა სითბოთი, ნდობითა და აქტიურობით. ახალგაზრდებისთვის ეს სივრცე იქცა ადგილად, სადაც შეიძლება გულწრფელად ისაუბრო და მერე იმოქმედო - ძალადობის წინააღმდეგ, თანატოლებთან ერთად.
დისკუსიების დროს ახალგაზრდები აზიარებენ საკუთარ გამოცდილებას, სწავლობენ კონფლიქტის მშვიდობიანად გადაჭრას, პატივისცემაზე დაფუძნებულ კომუნიკაციას და ძალადობის ამოცნობას და პრევენციის გზებს.
„ვხვდები, რომ ცვლილება ჩემით იწყება. მინდა, ჩემი მეგობრებიც მიხვდნენ, რამდენად მნიშვნელოვანია მშვიდობიანი ურთიერთობა და ერთმანეთის გაგება,“ – აღნიშნა ერთ-ერთმა მონაწილემ.
ახალგაზრდების სურვილია, მიღებული ცოდნა გადაიტანონ თავიანთ ყოველდღიურ ცხოვრებაში, შექმნან გარემო, სადაც კონფლიქტი დიალოგით წყდება, ხოლო ძალადობას ადგილი არ აქვს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
- რამდენად მნიშვნელოვანია ქალთა მხარდაჭერის ცენტრებში ჩატარებული საინფორმაციო შეხვედრები, როგორ იყენებენ მიღებულ ინფორმაციებს ქალები? რა გამოწვევები აქვთ და რა ტიპის მხარდაჭერას საჭიროებენ? - ამ და სხვა კითხვებზე გასცეს პასუხი შეხვედრების მონაწილე ქალებმა.
- ინფორმაციის მიღება და მისი გამოყენება ძალადობის პრევენციას ემსახურება. ამიტომ ვცდილობთ ყველა ინფორმაცია გავიტანოთ, მივაწოდოთ იმათ, ვისაც ნამდვილად სჭირდება, - აღინიშნა შეხვედრებზე.
შეკრებილები ქალთა საჭიროებებზეც საუბრობდნენ. მათთვის მტკივნეულია მიგრაცია, ახალგაზრდების დაუსაქმებლობა, საზოგადოებაში არსებული მაღალი აგრესია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საქველმოქმედო ჰუმანიტარულ ქალთა ფონდ „სოხუმს“ გერმანიიდან განსაკუთრებული სტუმრები ეწვივნენ - ჩვენი დონორი ორგანიზაციის „პური მსოფლიოსთვის“ წარმომადგენლები: დოროთეა ვოლფი, კლაუდია ჰინდერერი და ალინა ჰირშმეიერი.
ვიზიტის დასაწყისშუ მათთვის მოეწყო ჩვენი საქმიანობის პრეზენტაცია მიმართულებების მიხედვით: ქალთა მხარდაჭერის ცენტრები, ახალგაზრდობის გაძლიერების ცენტრები, სარეაბილიტაციო ცენტრი, დღის ცენტრები, ფორუმ-თეატრი, პროექტის სამშვიდობო საქმიანობის კომპონენტი, მონიტორინგი და ადვოკატირება, საინფორმაციო მუშაობა.
ახალგაზრდულმა ფორუმ-თეატრმა ჩვენი ოფისის ეზოში წარმოადგინა ინგლისურ ენაზე მომზადებული სცენა, რამაც სტუმრების აღტაცება გამოიწვია.
სტუმრები გაეცნენ ქუთაისის და სენაკის დღის ცენტრების საქმიანობას, გაესაუბრნენ პოლიმერული თიხის და ჭრა-კერვის კურსების მონაწილეებს, შეუქეს ნახელავი.
სენაკში შეხვდნენ ქალთა მხარდაჭერის ცენტრის აქტივისტ ქალებს, წყალტუბოში კი დაესწრნენ ტრენინგს ახალგაზრდებთან.
ყოველივე ამან დიდი შთაბეჭდილება მოახდინა ჩვენს დონორებზე. მათ აღნიშნეს, რომ მიუხედავად სირთულეებისა და გამოწვევებისა, ფონდი „სოხუმი“ წარმატებით განაგრძობს მუშაობას ქალებთან და ახალგაზრდებთან, რაც სასიხარულო და დასაფასებელია.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ოქტომბერში სარეაბილიტაციო ცენტრში იმყოფებოდნენ ქალები სამეგრელოს ერთ-ერთი მუნიციპალიტეტიდან.
მათთან კომპლექსურად იმუშავეს ფსიქოლოგმა, იურისტმა და სოციალურმა მუშაკმა. ყველაზე მეტ დროს ფსიქოლოგი ატარებდა. ამიტომაც მას სათქმელიც მეტი აქვს:
„ყოველდღიური ურთიერთობით თანდათან გაიხსნა მათი შინაგანი სამყარო. ამბობდნენ, რომ ხმამაღლა არასდროს უსაუბრიათ იმ პრობლემების შესახებ, რომელთაც წლების მანძილზე ტვირთად ატარებენ. ერთ მათგანს ბავშვობიდან ჩაუნერგეს მორჩილებაში ცხოვრება და, უკვე ასაკში მყოფი, კარგად ხვდება, რა ზიანი მოუტანა უსიტყვო მორჩილებამ, მაგრამ არაფრის შეცვლა არ შეუძლია... მისთვის შვება იყო, როცა ვუსმენდი მის ისტორიას. არ უნდოდა საუბრის დასრულება, იმიტომ რომ უსმენდნენ“.
ქალებმა ჩანაწერები დატოვეს. ფრაგმენტები მათი წერილებიდან:
„ადგილი, სადაც ვისვენებ, არის სულიერი სამოთხე“...
„ვფიქრობ, რა კარგი იქნებოდა ცხოვრება, ცოტა სხვანაირად რომ მეცხოვრა“...
„ეს არის ადგილი, სადაც შევძელი მეფიქრა ბედნიერ მომავალზე და, ვფიქრობ, აუცილებლად დავაღწევ თავს წარსულის მოგონებებს. მიყვარხართ“...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
დიდი ინტერესით შეუდგნენ „მოსწავლეები“ სწავლას.
ქალთა მხარდაჭერის ცენტრის აქტივისტების თხოვნით, დღის ცენტრი ახლა სენაკში გაიხსნა - არიან მსურველები და ქალები ჭრა-კერვას შეისწავლიან.
სწავლება ტარდება სენაკის სათემო განათლების ცენტრში (განთავსებულია დევნილთა კომპაქტურ დასახლებაში - სენაკის ყოფილ სამხედრო ქალაქში).
საბაზისო კურსი ორი თვე გაგრძელდება და შემდეგ ქალებს დასაქმების ახალი პერსპექტივები გაუჩნდებათ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალები ნათელ, მზიან ოთახში მეცადინეობენ და ზოგჯერ „სასწაულებსაც“ ახდენენ...
მასწავლებელი მაკა ჯიშკარიანი უშურველად უზიარებს მათ თავის ცოდნას, გამოცდილებას, უამრავ საიდუმლოებას...
ქუთაისის დღის ცენტრში პოლიმერულ თიხაზე მუშაობის ახალი კურსი დაიწყო.
პირველივე გაკვეთილებიდან იგრძნობა ინტერესი, მონდომება. სიხალისე... ორი თვის შემდეგ, შემაჯამებელ შეხვედრაზე მოსწავლეები თავიანთი ნამუშევრების გამოფენას მოაწყობენ და იტყვინ, რომ მიღებულ ცოდნას პრაქტიკაში გამოიყენებენ...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრის მობილიზატორებმა საინფორმაციო შეხვედრებზე ექვსი ახალი ქეისის იდენტიფიცირება მოახდინეს.
ყველა შემთხვევაში რისკის და ძალადობის განვითარების ალბათობა მაღალია. პროცესში ჩაერთნენ მობილიზატორები, აქტიურად გამოიყენება პრევენციული ქმედებები.
ფსიქოლოგთან საუბარი პოზიტიურად მოქმედებს ქალებზე. ქალები პრობლემიდან თავის დაღწევის გზებს ეძებენ. მობილიზატორები სამუშაოს მოძიებაში დაეხმარნენ რამდენიმე ბენეფიციარს და ამ ოჯახებში სოციალური ფონით გამოწვეული კონფლიქტების განვითარების რისკებიც შერბილდა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
- როგორ მიმდინარეობს ოჯახში ძალადობის პრობლემის იდენტიფიცირება, ქალთა საჭიროებების გამოკვეთა და მათი ადვოკატირება, ქეისების იდენტიფიცირება და მართვა - ამ საკითხებზე იმსჯელეს ქალთა მხარდაჭერის ცენტრის მობილიზატორებმა ონლაინ გამართულ შეხვედრაზე.
მონაწილეებმა გამოწვევებსა და პრობლემებზე გაამახვილეს ყურადღება. მათი მოსაზრებით, იდენტიფიცირების პროცესი უფრო გართულებულია, თუმცა ამ მიმართულებით მუშაობის გაგრძელების აუცილებლობა იკვეთება. ამიტომ პრევენციული ღონისძიებები, ქალთა ინფორმირება და მიზნობრივი გადამისამართება აქტიურად გაგრძელდება.
შეხვედრის მონაწილეებმა ტექნიკურ საკითხებზეც ისაუბრეს: როგორ აისახოს ანგარიშში თვის განმავლობაში შესრულებული სამუშაოები, მიღწეული შედეგები და გამოწვევები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
„თემები ძალიან აქტუალურია, გამოვიყენებ ცხოვრებაში“.
„ამ თემებზე აუცილებელია საუბარი ჩვენს ასაკში“.
„უკვე კონფლიქტებს ვაკვირდები და ვცდილობ მოგვარებას“.
დასრულდა ექვსთვიანი სატრენინგო კურსი და ეს მონაწილეთა უკუკავშირია.
შემაჯამებელი შეხვედრა ათივე მუნიციპალიტეტში წარმატებით ჩატარდა შეკრებილების წინაშე გამოვიდნენ წინასწარ შერჩეული პრეზენტატორები, ახალგაზრდებმა გულახდილად ისაუბრეს კონფლიქტების და ძალადობის თემაზე ჩატარებულ ტრენინგებზე, კურსის მნიშვნელობაზე მოზარდებში, გავლენაზე, ცვლილებებზე.
ლიდერებმა აქტიურად იმუშავეს პრეზენტაციებზე, სირთულეების მიუხედავად, შეხვედრები ორგანიზებულად ჩატარდა.
ასევე წარმატებით მოხდა ახალი ჯგუფების ფორმირება - ოქტომბერში ახალი სატრენინგო კურსი დაიწყება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საინტერესო ფორმატით წარიმართა დიალოგი სამოქალაქო განათლების მიმართულებით მომუშავე სპეციალისტებთან. ონლაინ შეხვედრის თემა - „მიგრაციის ფსიქოსოციალური, ეკონომიკური, სამართლებრივი, სტრუქტურული ასპექტები და მისი პრევენციის ღონისძიებები“.
მონაწილებს გავაცანით ფონდი „სოხუმის“ კვლევის მიგნებები, ციფრული რესურსი www.sosfsokhumi.ge, ვისაუბრეთ ქალთა მიგრაციის ძირითად ფაქტორებზე, უკონტროლო მიგრაციის ფსიქოსოციალურ შედეგებსა და შემცირების მნიშვნელობაზე.
გაიმართა საინტერესო დიალოგი მიგრაციის პრევენციის მექანიზმებზე, მიგრაციული ტენდენციის ჯგუფებზე. შეხვედრის მონაწილეებმა გაგვიზიარეს საკუთარი დაკვირვება, რომ თუ წინა წლებში მიგრაცია უფრო ქალაქის მოსახლეობას შეეხებოდა, უკვე სოფლებიც იცლება, რადგან სოფლის მეურნეობაში ძალიან რთულად შემოდის ინოვაციები, ნიადაგი გამოიფიტა, შემოსავალმა მნიშვნელოვნად იკლო. ნაკლებად ხდება წარმატებული ადგილობრივი მეწარმეების პოპულარიზაცია.
ითქვა, რომ უკონტროლო მიგრაციის შემცირება რთულია შესაბამისი პოზიტიური სოციალურ-ეკონომიკური გარემოს გარეშე, მაგრამ ამის პარალელურად, აუცილებელია, საზოგადოებამ გაიაზროს, რა ნეგატიური ფსიქოემოციური შედეგები მოსდევს მიგრაციას ოჯახებისთვის: გაუცხოება, მშობლების სითბოს მოკლებული ბავშვები, ზედმეტად მძიმე ზრუნვის ტვირთი ხანდაზმულებისთვის, რომ არაფერი ვთქვათ „ტვინების გადინებაზე“, დემოგრაფიული სურათის შეცვლაზე. ამიტომ მნიშვნელოვნად მიაჩნიათ საზოგადოებრივი დიალოგი მიგრაციის საკითხებზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)